Шүлэгч анддаа

Аяа, найрагч минь чамайг би
Амь наснаасаа дутуугүй хайрлаж явлаа.
Амьтны хов хэрэм болон биднийг зааглаж
Андын сэтгэл, хүний ёсыг
Авдарт орсон хулгана шиг мэрлээ

Элдэвт үл автах чанар, авьяасыг чинь үнэлж
Эр хүн шиг чамайг би хайрлаж явлаа?
Эд баялаг, сэтгэл санаа, шүлгээ хүртэл зориулж
Эхнэрээсээ бусдыг л чи бид хоёр хувааж явлаа?
Эдүгээ чи минь юу болов доо?


Адилхан гуниг цээжинд дүүрэн
Алсын уулыг нэгэн нүдээр ширтэж явсан
Адилхан сэрэл зүрхэнд оргилон
Амьтны орчлонг хайрлаж явсан
Атаархлын манан биднийг хучна гэж үү?

Итгэлтэй хүн нэг ч үгүй юм бол
Энэ орчлонд амьдрах хэрэг юун
Ирмэх зуур хувирдаг хорвоо юм бол
Эргэлзэж гайхаад биесийг зовоох ч юун
Эртхэн л хоёр тийшээ салья?

Гэвч нэг учир байна, гам зэмгүй зүрхээ өрөвдөх юм
Гэгээн орчлонд чамайг алдвал,
                               өөрийгөө алдсанаас ялгаа юун?
Гэрэл харанхуйг ялгаж чадахгүй бол
                               найрагч байх ч хэрэг юун?
Андын сайхан сэтгэлийг, амьтны сайхан ёсыг
Атаа жөтөө, хов живнээс дээгүүр тавибал
Ахиад, бид хоёрт эвлэрэх нэг зам байна???.....
                                                           О.Дашбалбар1980 он 12-р сар Москва

              Бага далжганаарай хэмээн хүндэтгэсэн С.Начин

              Түрүү гарсан бөөснүүд толгой дээр завилахгүй шүү Ш.Я.Баяр

Яаж даасан юм бэ? Миний зүрх энэ их харанхуйг

Яаж даасан юм бэ? Миний зүрх энэ их харанхуйг...
Яруу найргийн төлөөх уйтгарт тэр өдрүүдэд...
Дэлхий шиг том гуниг үүрч, нуруу бөгтөр алхсан
Дэмийрч үзсэн,
                          солиорч үзсэн
                                      цэв хүйтэн мөчүүдэд?

Эхлэл нь төгсгөлөөсөө гунигтай
Эгнүүлж тарьсан гудамжны модод шиг эмх цэгцтэй
Гүн чагнахад: Тоо томшгүй хөдөлгөөнтэй
Гүц тонгойлгож...дарс хундагалах шиг хэмнэлтэй

Мэдрэмжийн тухай тэр бүсгүй надад
Мэдээжийн юм их олныг ярьсан
Харин би өөдөөс нь гунигтай харж инээмсэглэхдээ
Хаалга түгжихээ мартсан...

түүний алдааг уучилсан

Эндээс эхэлсэн бүх юм гунигтай?
Эхлэл шиг, төгсгөл шиг цас будравч гунигтай
Яаж даасан юм бэ? Би... Энэ их хүндийг
Яруу найргийн төлөөх
                                      уйтгарт тэр өдрүүдийг

                                  2009.11.17 М.Уянсүх Саран гүний тэнгис "номны 169-р тал
                                        
  

Г.Анхзул-д

                                      Зүрхээ хослоод зурчихсан
                                      Зүггүй тэр л бүсгүйд би хайртай
                                      Сэтгэлд нь нийцэх гэж
                                      Сайхан шүлэг тэрлэхдээ ч дуртай
                                      Нарны алтан цацраг
                                      Дэрсний сугсраанд гялбалзхад
                                      Намайг дотроо хайрладгийг чинь
                                      Дэндүү ихээр мэдэрдэгээ нуухгүй ээ
                                      Амраг цагаан уул минь
                                      Адайр хөх салхи минь
                                      Аадрын цагаан манан минь
                                      Алдаад барьж авж чадалгүй үлдсэн
                                      Эр хонгор нулимсны минь
                                      Эрэвгэр сормуусны мандалд
                                      Анх миний зүрхийг бүрэн таньсан
                                      Ааш дөлгөөн хонгор минь дээ
                                      Зүрхнийхээ мөсөн агуйг
                                      Чамайг надад ирсэн цагт хайлуулна
                                      Зөрөөд өнгөрөх халуун зүрхтэй бүсгүйчүүдээс
                                      Чамд л гэсээр хөлдүү хэвээр нь хадгалах болно

                           
 1.Моддын санаа алдалт
                  Намарт эгших нь
                  Мөдхөн цас орохын дохио юм шиг
                  Нэг л мэдэхнээ бударч эхэлнэ
               2.Орох цасны ширхэг бүрийг
                  Хурууныхаа өндгөөр тэмтэрч
                  Оддын дор бөхөнгүй алхахыг
                  Хэн нэгний зүүдэнд хэлхэхэд
                  Харагдах биетгүй хэрнээ
                  Үзэгдэх шинжгүй салхисын
                  Хаанаас нь тийм их эрч
                  Үл мэдэг дайвалзахыг тайлж үл ядна
               3.Шүлс хаяхын төдийд
                  Сарнин замхарах биет аниргүйгээс                                                                                                         Шинийн сарны дугариг амьсгаа
                  Сул гэнэхэн анивхийлэх нь
                  Шинэ үнэр түгээх
                  Солонгогүй борооны дүрсгүйтэл                                                                                                                          
                                                                                                

                                                              

БОРОО

Бороо дусагнаад л тэгсэн хэрнээ
Нэг л гуниглангуй 
Нулимсаа хатамжилсан эрх хүүхэд шиг
Бүр тийм л гэсэн шиг ганц хоёрхон дусал
Хаяад л....


Яг миний зүрхний түг түг хийх цохилт шиг
Ялгуухан алгуурхан асгараач
Ямар үед нь ороод, хэдийд нь цурхирдагаа
Яг одоо хэлээд өгөөч
Асгараач.....

Азиза

Түүнтэй олон наадмын тайзан дээр л таарч байсан болхоос биш их

сургуулийн гудамжинд таарч өөрийнх нь гуравдахь ном болох Азизагийн дээжээс авна чинээ  санасангүй. Хувь тохиол гэдэг гагнаж өгөх нөхөрлүүлэх хүнээ холбодог гэдэг шиг, ямар нэгэн эгшил цохицолын бүрдээгэээр л учраа биз. Энэ хайлган хаврын эгшигт униарт дунд номын чинь дээжээс авч хаврын салхитай найрсаж уншиж байгаадаа тун их олзуурхаж байна.Үнэр нь арилж амжаагүй шинэ номны өлгийн боолтыг тайлхад ийм л шүлгүүд ханхийнэ.

Урууланд чинь би, уруулаа хүргээд унтах
Ямар сайхан байдаг гээч хайрт минь
Бурхан л ингэж Гүмүда цэцгийн дэлбээн дээр
Гэзгээ тавьж унтдаг байх даа

Сормуусан дор чинь би, сормуусаа эвээд унтахад
Ямар гоё зүүд зүүдэлдэг гэж санана хайрт минь
Тогорууд л ингэж шөнийн зовхин дотуур
Сарны зэлгээн туяаг залгилж нисдэг байх даа

 Хацарт чинь би, хацраа наагаад унтахад
Ямар гоё дулаахан байдаг гэж бодож байна хайрт минь
 Гөрөөс л ингэж халуун хэвтэртээ
 Таван сарын модод гөлөглөхийг харж хонодог байх даа

 Хөхөн дээр чинь би гараа тавиад унтахад
 Ямар тааламжтай мэдрэмж төрдөг гээч хайрт минь
                                                        Өвс л ингэж нартай бороонд усанд ороод гарахдаа
                                                        Солонгоор биеэн арчдаг байх даа
Зүрхэн дээр чинь би, зүрхээ тавиад унтахад
Ямар хэцүү их өвдөлт мэдрэгддэг гэж санана хайрт минь
Үнэнч хайрынхаа төлөө цэл залуухан Пушкин ийм их өвдөлтөөр
Үхэл рүү явах тасалбар худалдаж авсан байх даа

Гэрэлт цохонд тавьсан асуулт

-Гэрэлт цох оо
Өвсний юунд нь чи тэгтлээ
Шунан дурлана вэ?
-Өө би тэгээд хэндээ
Өөрийн зохиосон хийлийн гоцлолоо
Тоглох юм бэ?

-Гэрэлт цох оо
Чиний далавчин дээрх толбонууд
Хэн гээчийн гарын үсэг вэ?
-Энэ толбонууд уу...?
Чш...\навчис\ амиа хорлочихно

-Гэрэлт цох оо
Чимээгүйтэй чи
Ямар хэлээр яриад байсан бэ?
-Аан шавьжинд зориулсан англи хэл үү?
Тэр хэлийг чинь би авгалдайн дотроо байхдаа л
Сурсан юм

-Гэрэлт цох оо
Мэлхийнүүдийг чи
Яаж орхио вэ?
-Мэлхийнүүд миний цагийг эвдчихсэн юм
Тэгэхээр нь жаахан цаашлуулах аядаад л
Цөөрөмд хорьсон юм

-Гэрэлт цох оо
Намар болохоор чи
Хаа очдог юм бэ?

-Тэр нууцыг тайлчихвал
Бүх юм гоо сайхнаа  алдчихна
-Гэрэлт цох оо
Үхлийг чи
Юу гэж төсөөлдөг вэ?
-Үхэл над дээр ирвэл
Тэвэрч үнсээд
Орон зайг хэмждэг тэмтрүүлээ бэлэглэнэ.

Өөр асуулт байна уу? Түр баяртай                                                                   

    
                                                                  .                                                                   Нарны урдуур                                                         
                                                           Нэг шувуу
                                                               Нэг өвс зууж ниснэ
                                                                        Нарны урдуур
                                                                              Хоёр шувуу     
                                                                        Хоёр өвс зууж ниснэ
                                                                Нарны урдуур
                                                           Гурван шувуу
                                                 Гурван өвс зууж ниснэ
           
 Өлгийтэй хүүхдийн нялх дуу орчлонгоор нэг шуранхай хадаах өдөр 2011-оны 04.09-ны хагасайн өдөр 12 цагаас интэр ном дээр болох бөгөөд, нийт үзэг нэгт уран бүтээлчдийг хүрэлцэн ирхийг хүсье?